XIII EDICIÓN DE MÚSICA NO CLAUSTRO #REENCONTROS // DIRECCIÓN ARTÍSTICA DE SAMUEL DIZ

© Gore Vázquez

A Catedral de Tui convídanos á edición de maior envergadura e internacionalidade do festival Música no claustro. Sete días de #reencontros coa música, co patrimonio e coa creación, aos que se suma o concerto de presentación no Museo Nacional de Escultura.

Unha dobre sede co nome propio de #DiegodeAvellaneda. O legado dos seus escasos dez anos de bispado na Catedral de Tui aínda é notorio ao igual que no Museo Nacional de Escultura, entidade que conserva o seu valioso sepulcro renacentista desde 1933.

O bispo #DiegodeAvellaneda e o seu sepulcro articulan un programa narrativo de catro concertos de primeiro nivel con músicas renacentistas, barrocas, contemporáneas e jazz; un taller e unha conferencia de imaxinería castelá; sete percorridos arquitectónicos nocturnos e a conversa inaugural na Catedral de Tui con María Bolaños Atienza, directora do Museo Nacional de Escultura.

A ilusión e enerxía das novas xeracións continúa presente noutros catro concertos de música de cámara, jazz, blues e soul, coa presentación do novo disco de Eva Fernández, co debut en Galicia da cantante africana Tina Masawi ou co novo formato do tradicional ciclo de novos intérpretes.

Yolanda Castaño dálle vida á verba poética galega contemporánea xunto á presentación dun libro que nos mostra a primeira viaxe de estudos a Galicia do músico, con alma de poeta, Federico García Lorca.

O compromiso social de Música no claustro traballa por continuar ofrecendo a entrada libre a todos os concertos do programa. Nesta XIII edición afrontamos o novo reto de avanzar na adaptación do acceso ao espazo e actividades a persoas con discapacidade visual canda á ONCE.

O meu agradecemento persoal e colectivo a todas as institucións, empresas e persoas que fan posible esta agardada edición de Música no claustro, un festival entre o “doméstico” e o “monumental” nun dos espazos máxicos do patrimonio e da paisaxe galega: a Catedral de Tui.


SÁBADO 4 // Conversa con María Bolaños, directora do Museo Nacional de Escultura. O sepulcro de Diego de Avellaneda

Actualización: Lamentablemente María Bolaños, directora do Museo Nacional de Escultura, non poderá viaxar a Tui por unha caída e fractura dun pé. Pero xunto ao seu apoio a Música no claustro, deixounos esta fermosísima entrevista realizada por Xesús Fraga para toda Galicia e que vos convidamos a ler >> La Voz de Galicia: María Bolaños: «El museo es memoria y laboratorio»

Continúa programado o concerto de apertura polo Álterum Cor, coro residente do Museo, o sábado 4 de agosto ás 21.30 h no claustro gótico da Catedral de Tui.

Sepulcro de Diego de Avellaneda © Museo Nacional de Escultura

Sábado, 4 de agosto (21.30 h) · Entrada libre
Claustro da Catedral de Tui

CONVERSA DE SAMUEL DIZ CON MARÍA BOLAÑOS, DIRECTORA DO MUSEO NACIONAL DE ESCULTURA
1933, unha data clave para o Museo Nacional de Escultura. O sepulcro do bispo de Tui Diego de Avellaneda

Profesora titular de Historia da Arte na Universidade de Valladolid, María Bolaños Atienza dirixe desde 2008 o Museo Nacional de Escultura. Entre as mostras que desenvolveu destaca a magna exposición Ésto me trae aquí dedicada ao fundador do museo: Ricardo de Orueta (1868-1939).

Foi o propio Orueta, como director xeral de Belas Artes nos anos 30, quen rescatou o sepulcro de Diego de Avellaneda do mosteiro xerónimo de San Juan Bautista e Santa Catalina de Espeja (Soria) e o trasladou ao Museo Nacional de Escultura (Valladolid). Unha destacada obra funeraria española do século XVI realizada en alabastro, xaspe e pedra calcárea por Felipe Bigarny.

Diego de Avellaneda foi bispo da Catedral de Tui, baixo o reinado do emperador Carlos V, entre 1526 e 1537, ano do seu falecemento. Xunto coas modificacións arquitectónicas que realizou na sé tudense, foi un bispo reformador no coidado e valoración da cada documento como fonte inapreciable da historia. A súa personalidade administrativa, pioneira no custodio dos arquivos parroquiais e diocesanos, levárono á Presidencia da Chancillería de Granada nos últimos anos da súa vida.

María Bolaños Atienza mostranos coa súa elegante e característica sensibilidade, nesta conversa co director artístico de Música no claustro, as particularidades e intrahistoria do sepulcro desde 1933 á actualidade.


SÁBADO 4 // Concerto "Polifonía sacra renacentista. As músicas na época de Diego de Avellaneda" de Álterum Cor

© Raquel Asensio



Sábado, 4 de agosto (21.30 h) · Entrada libre
Claustro da Catedral de Tui

ÁLTERUM COR
Polifonía sacra do Renacemento europeo. As músicas na época de Diego de Avellaneda

Álterum Cor regresa a Música no claustro cos grandes nomes da música sacra do Renacemento europeo sobre o atril: Josquin des Prés ou Thomas Tallis xunto ás obras dos españois Juan de Anchieta, Francisco Guerrero ou Tomás Luis de Victoria, partituras tomadas dos arquivos da Parroquia de Santiago Apostol ou da Catedral de Valladolid. Un repertorio do que son especialistas como formación coral residente do Museo Nacional de Escultura.

O seu director, Valentín Benavides e os seus integrantes convídannos a esta introspectiva viaxe musical á época de Avellaneda cunha coidada interpretación que inclúe o Mille Regrezt, a canción predilecta de Carlos V.

Virgen bendita sin par · Pedro Escobar (ca.1465-ca.1535)

Gaude virgo, mater Christi · Josquin des Prez (ca.1450-1521)

Mille Regretz · Josquin des Prez

Domine Jesu Christe · Juan de Anchieta (ca. 1462-1523)

Circumdederunt me · Cristóbal de Morales (ca.1500-1553)

Manus tuae, Domine · Juan Vásquez (ca.1500 - ca.1560)

If Ye love me · Thomas Tallis (ca.1505-1585)

Salve Regina · Canto Gregoriano (s. XV)

Rex autem David · Bernardino de Ribera (1520-ca.1572)

Posuerunt super caput eius · Rodrigo de Ceballos (ca. 1525-1591)

Dicebat Jesus · Juan Navarro (ca. 1530-1580)

O vos omnes · Tomás Luis de Victoria (1548-1611)

Maria Magdalena et altera Maria · Francisco Guerrero (1528-1599)


Sopranos
Carolina Ruiz, Cristina de la Rosa, Mª Eugenia Díaz-Emparanza, Marta Conill, Melania Mayo e Pamela Melero

Altos
Arantxa Jaén, Beatriz Soria, Esther Saiz, Lucía Escorial, Manuela del Caño e Victoria García

Tenores
Alejandro García, José de la Fuente, Juan Jesús Barrientos, Miguel Ángel Cerezal e Ricardo Allende

Baixos
Carlos Gutiérrez, César Méndez, Jesús Garrote e José Ignacio Sánchez




DOMINGO 5 // Concerto "13 cancións bonitas". A estrea do novo proxecto de Germán Díaz e Benxamín Otero

© José Luis Puértolas. Música no claustro 2013

Domingo, 5 de agosto (21.30 h) · Entrada libre
Claustro da Catedral de Tui

GERMÁN DÍAZ e BENXAMÍN OTERO
13 cancións bonitas

Entre finais do século XIX e principios do XX -parello á recuperación do patrimonio monumental que atendeu ao sepulcro de Avellaneda- existiu un especial interese na recompilación do cancioneiro popular español de tradición oral.

Música no claustro convídanos ao reencontro co zanfonista Germán Díaz, gran coñecedor e divulgador deste legado musical, que presenta, xunto a Benxamín Otero, unha escolma de trece melodías evocadoras, transfiguradas nunha das linguaxes máis creativas da escena contemporánea galega.

Un dúo de óboe e instrumentos mecánicos que lle dá vida neste novo proxecto ás ruedas castellanas do Cancioneiro de Olmeda, aos cantos galegos recollidos por José Inzenga ou ao tradicional Romance de Santa Catalina.


LUNS 6 // "Blues and Soul night" con Tina & Joe. O debut galego da cantante africana Tina Masawi



Luns, 6 de agosto (21.30 h) · Entrada libre
Claustro da Catedral de Tui

TINA & JOE
Blues and Soul Night

Tina Masawi é unha das voces máis penetrantes da nova xeración musical do continente africano. A voz convértese nun xogo co seu amplo rexistro de cores e matices. Natural de Zimbabwe, en 2013 recibiu o galardón á mellor actriz de musicais de África.

Agora chega por vez primeira a Galicia canda o guitarrista español José Antonio Hernández nunha proposta de alta calidade e elegancia na que o dúo interpreta un repertorio, seleccionado cuidadosamente para a ocasión, entre clásicos retros e modernos do jazz, blues e soul.


LUNS 6 // Percorrido "Caricias en braille" coa ONCE



Luns, 6 de agosto (18 h) · Entrada libre
Catedral de Tui

CARICIAS EN BRAILLE
Itinerario artístico-escultórico adaptado a persoas con discapacidade visual

A XIII edición de Música no claustro convida por vez primeira a un encontro e diálogo de persoas con e sen discapacidade visual. Unha experiencia na que se poden tocar diferentes obras do legado artístico da Catedral de Tui e descubrir a través do tacto os diferentes materiais e as texturas da escultura. Un itinerario de 90 minutos de duración que finaliza no propio obradoiro de imaxinería castelá que se desenvolve no claustro, coa descuberta das formas e dos aromas das ferramentas, das madeiras e dos tintes naturais.

// En colaboración coa ONCE

MARTES 7 // Conversa "Os segredos da imaxinería castelá" con Miguel Ángel Tapia




Martes, 7 de agosto (20.15 h) · Entrada libre
Claustro da Catedral de Tui

CONVERSA CON MIGUEL ÁNGEL TAPIA
Os segredos da imaxinería castelá

Na nosa visita ao Museo Nacional de Escultura descubrimos as fascinantes obras de Alonso Berruguete ou do galego Gregorio Fernández, dous nomes propios da Escola Castelá que tivo á cidade de Valladolid como epicentro no século XVI.

Da man do imaxineiro Miguel Ángel Tapia, experto recoñecido na continuidade da Escola Castelá, realizamos un taller intensivo de 32 horas de duración. Un curso que nos ofrece a posibilidade de traballar os conceptos básicos da anatomía na escultura tradicional de base relixiosa e as técnicas en talla de madeira, así como os dourados, os estofados e as policromías con materiais naturais.

Como peche ao taller de artesanía e a través das obras traballadas nel, Miguel Ángel Tapia comparte con nós, de forma pedagóxica, os procesos de construción na imaxinería castelá, nunha conferencia aberta ao público.


TALLER DE ARTESANÍA
Imaxinería castelá

Do sábado 4 ao martes 7 de agosto, de 10.30 a 14.30 h e de 16.30 h a 20.30 h
12 participantes · Matrícula de 50 € para artesáns ou artesás inscritas no Rexistro Xeral de Artesanía de Galicia, ou de 75 € para o resto de persoas participantes. Inscrición en artesaniadegalicia.xunta.gal.

// Co apoio da Fundación Pública Artesanía de Galicia e CEARCAL, Centro Regional de Artesanía Castilla y León


MARTES 7 // Concerto "Pajarillos fugitivos: canciones españolas fuera de casa" do arxentino Jonatan Alvarado

© Gertjan Vos

Martes, 7 de agosto (21.30 h) · Entrada libre
Claustro da Catedral de Tui

JONATAN ALVARADO
Pajarillos fugitivos: canciones españolas fuera de casa

Coa súa natural frescura, a medio camiño entre as esferas do “popular” e do “académico”, o cantante e laudista arxentino Jonatan Alvarado preséntanos un conxunto de cancións de orixes diversas, unidas por sutís fíos narrativos, poéticos e musicais. Cancións organizadas en cinco grupos temáticos que se alternan como os paneis brillantes e refinados dun retablo renacentista.

Entre estas orixes destaca o Codex Zuola, un manuscrito colonial barroco descuberto no primeiro terzo do século XX. Entre as súas cancións atopamos a que lle dá título a este concerto e a recente publicación discográfica de Jonatan Alvarado: Pajarillos fugitivos.


TODAS AS NOITES // Ambigú no xardín de Palacio da Catedral, un lugar de encontro de públicos e artistas

© Tamara Rodríguez

Todas as noites ao remate do concerto · De acceso libre para o público do concerto

AMBIGÚ NO XARDÍN DE PALACIO DA CATEDRAL
Encontros de artistas e públicos ao remate dos concertos

Música no claustro, como fixeron tradicionalmente os teatros cos ambigús, ábrelle ao público un servizo de consumicións no xardín do Palacio da Catedral. Un espazo de encontro e conversa onde relaxarse coa vista nocturna da paisaxe miñota baixo as noites estreladas do mes de agosto. Un momento para compartir cos artistas e asistentes un albariño D. Pedro de Soutomaior acompañado dun petisco elaborado con produto Coren Selecta.

MÉRCORES 8 // Concerto "Paris 1918, pour le tombeau de Claude Debussy" de Kebyart Ensemble



Mércores, 8 de agosto (21.30 h) · Entrada libre
Claustro da Catedral de Tui

KEBYART ENSEMBLE
Paris 1918, pour le tombeau de Claude Debussy

Kebyart Ensemble é un dos cuartetos de saxofón máis prometedores da actualidade española. Creado na ESMUC no 2014, Kebyart Ensemble inspírase na riqueza tímbrica, rítmica e estilística da música tradicional de Indonesia e doutras músicas orientais.

O ciclo “El Primer Palau”, o Concurso Permanente de Xuventudes Musicais, o Concurso Internacional de Música de Cámara Higini Anglès ou o Premio de Música de Cámara Montserrat Alavedra– BBVA son algúns dos galardóns que avalan a súa enerxética traxectoria.

No centenario do falecemento de Claude Debussy, Kebyart Ensemble presenta unha escolma das súas obras para piano, ao igual que a obra de cámara de Joseph Haydn e a música húngara de Ferenc Farkas. O compromiso coa creación contemporánea chega co efecto óptico dos tres soles, ou parhelio, do compositor catalán José Río-Pareja.

// Concerto de entrada libre grazas ao fondo cultural AIEnRUTa Clásicos


Joseph Haydn (1732-1809)
Cuarteto Op.20 no.5 en Fa menor
Moderato
Minuet-Trio
Adagio
Finale-Fuga a 2 soggeti

José Río-Pareja (1973)
Parhelia (2018) obra encargo do Kebyart Ensemble

Claude Debussy (1862-1918) / Kebyart Ensemble
París 1918
Prélude da Suite Bergamasque
Menuet da Petite Suite
Le Petit Berger da Suite Children’s corner
Golliwog's Cake-Walk da Suite Children’s corner

Ferenc Farkas (1905-2000)
Antigas danzas húngaras


Pere Méndez Marsal - Saxo soprano
Víctor Serra Noguera - Saxo alto
Robert Seara Mora - Saxo tenor
Daniel Miguel Guerrero - Saxo barítono


XOVES 9 // Presentación de libro "De Granada a Galicia, a primeira viaxe de estudos de García Lorca"

© Óscar Cela

Xoves, 9 de agosto (20 h) · Entrada libre
En Ideas Peregrinas (rúa da Porta da Pía, 1)

PRESENTACIÓN DE LIBRO EN IDEAS PEREGRINAS
De Granada a Galicia: a primeira viaxe de estudos de García Lorca

En outubro de 1916, o músico con alma de poeta, Federico García Lorca chegou por vez primeira a Galicia canda os seus compañeiros da Universidade de Granada. Unha viaxe de estudos dirixida polo mestre Berrueta da que naceu o seu primeiro libro Impresiones y paisajes. Cen anos despois, a editora Alvarellos recupera o texto de Luis Mariscal, compañeiro de estudos de García Lorca, que nos brinda un testemuño único desta viaxe pola terra de Rosalía.

O espazo tudense Ideas Peregrinas ofrece nun ambiente fresco e relaxado este encontro con Henrique Alvarellos, quen estivo ao coidado da edición, e coa historiadora da arte Carla Fernández, quen nos ilustra sobre os monumentos visitados na viaxe de García Lorca e sobre o urbanismo galego do momento.

XOVES 9 // Música de cámara. Ciclo de novos intérpretes



Xoves, 9 de agosto (21.30 h) · Entrada libre
Claustro da Catedral de Tui

CICLO DE NOVOS INTÉRPRETES
A ilusión e a enerxía da nova xeración musical galega mantén vivo o compromiso e a memoria de D. Ricardo García (1929-2017) en Música no claustro. Estas catro propostas, seleccionadas nun proceso aberto, recibirán un conxunto de partituras da editorial Dos Acordes. Tras a actuación, o festival ofreceralle á proposta máis destacada unha bolsa de apoio ao seu desenvolvemento musical e artístico que finalizará cun concerto na seguinte edición de Música no claustro.




CARLOS PUGA
Vila de Cruces, 1993

Realiza estudos de percusión na Banda Artística de Merza e na ESMAE do Porto. Actualmente atópase en residencia no Conservatoire National Supérieur de Musique et Danse de Lyon (Artist Diploma), onde traballa co percusionista Jean Geoffroy.

K. Stockhausen (1928 - 2007)
Vibraelufa

Ben Wahlund (n.1977)
The Whimsical Nature of Small Particle Physics

Iannis Xenakis (1922 - 2001)
Rebonds A






JULIA CARO TRIGO
Santiago de Compostela, 1994

Realiza estudos de violoncello no CMUS Profesional de Santiago de Compostela, no CMUS de Aragón e na Musikene de San Sebastián. Actualmente continúa a súa formación con Asier Polo e forma parte da Xove Orquestra Gustav Mahler (GMJO).

Gaspar Cassadó (1897 – 1966)
Suite para Cello: Preludio - fantasía

Johann S. Bach (1685 - 1750)
Suite para Cello no.6: Allemande

Gaspar Cassadó
Suite para Cello: Intermezzo e Danza finale





NOELIA GONZÁLEZ
Carballedo, 1995

Realiza estudos de acordeón no CMUS Profesional de Ourense e no CMUS Superior de A Coruña co profesor Fernando Fraga. Actualmente realiza o derradeiro curso de grao superior no CMUS de Aragón (CSMA) en Zaragoza baixo as ensinanzas de Ander Telleria.

Johann S. Bach (1685 - 1750)
Preludio e Fuga en Do#M BWV 872

Sofia Gubaidulina (n.1931)
Sonata Et Exspecto





QUINTETO ENTRERÍAS

Estudantado de música de cámara no Conservatorio Superior de Música de Vigo. Os seus integrantes son: Óscar Rial Salgueiro, trompeta. Meaño, 1998. Desirée Gómez Bouzada, trompeta. Tomiño, 1997. Ainara González Gómez, trompa. Marín, 1998. Hugo Fernández Oliveira, trombón. Salceda de Caselas, 1996. Víctor Amorín Fernández, tuba Budiño, O Porriño, 1995.

Èugene Bozza (1905-1991)
Sonatina (movementos 1 e 4)

Enrique Crespo (n.1941)
Suite Americana: I Ragtime. II Zamba Gaucha. III Vals Peruano

Sonny Kompanek (n.1949)
Killer Tango

TODAS AS NOITES // Percorridos nocturnos pola Catedral de Tui

© Beatriz Fontán


Todas as noites ao remate do concerto // Capacidade de 20 persoas por noite
Reservas en contacto@musicanoclaustro.com

PERCORRIDO NOCTURNO POLA CATEDRAL
A Catedral de Diego de Avellaneda, con Suso Vila

Partindo do característico cimborrio da Catedral de Tui, elevado sobre o cruceiro da nave central cos trece roeis do escudo dos Avellaneda, descubrimos, co historiador especializado na catedral tudense Suso Vila, as pegadas de Diego de Avellaneda: os seus obxectos e orfebrerías pesoais, as súas vestiduras e os restos da Capela dos bispos á que trasladou a furna de San Telmo.

Desde a torre fortificada de Soutomaior recreamos a estructura do antigo palacio episcopal, lugar no que vivía durante as súas residencias tudenses. Este percorrido nocturno finaliza xunto aos músicos protagonistas do concerto no ambigú co convite a unha copa de albariño D. Pedro de Soutomaior.

VENRES 10 // Recital poético "A segunda lingua" de Yolanda Castaño

© Marcos Míguez


Venres, 10 de agosto (21.30 h) · Entrada libre
Claustro da Catedral de Tui

YOLANDA CASTAÑO
Recital poético: A segunda lingua

O corpo é o corpo e o idioma é o idioma: aí onde chocan, coas palabras que se rabuñan e a pel que non alcanza a tocarse, desenvólvese A segunda lingua, o último poemario de Yolanda Castaño.

Neste libro, que estivo a piques de acadar o Premio Nacional de Poesía, basea o seu recital poético quen constitúe un dos rostros máis populares da poesía galega contemporánea.

Un traballo que pescuda na lingua do outro, dos outros; nesa ponte que nos pon en relación cos demais e co mundo. E, tan pouco doado como é ás veces comunicarse, alcanzar ao outro é tamén con frecuencia un camiño que se frustra. Así e todo, no enorme compromiso co o cio desta poeta que desfruta recitando os seus versos por todo o mundo, gaña sempre a palabra: desde a emoción, con total honestidade e ata con sentido do humor.


VENRES 10 // Concerto "Yo pregunto" de Eva Fernández Jazz Trío


Venres, 10 de agosto (21.30 h) · Entrada libre
Claustro da Catedral de Tui

EVA FERNÁNDEZ TRÍO
Yo pregunto

Unha nova promesa do jazz catalán que destaca como saxofonista e cantante e que forma parte da lista de voces femininas máis destacadas.

Eva Fernández presenta en Galicia o seu novo disco, Yo pregunto, unha selección de poemas de Pizarnik, Storni, Costafreda e Cortázar musicalizados e compostos pola cantante e saxofonista acompañada polo guitarrista Josep Munar. Enric Fuster, á batería, completa a formación.

As notas brotaron inspiradas polos versos de grandes poetas ata reunir en Yo pregunto oito temas que conforman un repertorio doce, intimista e sedutor.

// Concerto de entrada libre grazas ao fondo cultural AIEnRUTa JAZZ.


VALLADOLID, 14 DE XUÑO // Concerto de presentación no Museo Nacional de Escultura. Nikola Tanaskovic



Xoves, 14 de xuño (20 h) · Entrada gratuíta con reserva previa
Museo Nacional de Escultura

NIKOLA TANASKOVIC
De profundis: de Cabezón a Gubaidulina

Coa música de Antonio de Cabezón, organista ao servizo de Carlos V, o acordeonista serbio Nikola Tanaskovic instrodúcenos na profundidade relixiosa da compositora rusa Sofia Gubaidulina, Premio Fundación BBVA Fronteras del Conocimiento.

A personalidade artística de Tanaskovic (Serbia, 1990) caracterízase polo seu virtuosismo e pola exploración sonora dos límites do acordeón na colaboración con diferentes compositores. Como lembra a Revista Musical Catalana, a propia Gubaidulina desfíxose en eloxios despois de escoitar a súa obra De profundis baixo a interpretación de Nikola Tanaskovic.


Antonio de Cabezón (1510 - 1566)
Himno XIX: Pange Lingua IV

Sofia Gubaidulina (1931)
Sonata Et expecto

Girolamo Frescobaldi (1583 - 1643)
Toccata cromaticha per le levatione

Antonio de Cabezón
Tiento do Segundo Tono

Sofia Gubaidulina (1931)
De profundis