Concerto no claustro medieval da Catedral de Tui, 21h.
Entrada libre por orde de chegada, sen reserva previa.
Apertura de portas 20h45
Samuel Diz e Jonatan Alvarado, fotografía de © Xosé Durán
Sábado, 1 de agosto, 21h
Apertura
Concerto
SAMUEL DIZ, guitarra
PATRICIA GONZÁLEZ, frauta
JONATAN ALVARADO, voz
BEGOÑA RIOBÓ, violín
ANXO PINTOS, zanfona
A frautista Patricia González e o guitarrista Samuel Diz ofreceron en 2005 os primeiros concertos de Música no Claustro. Dúas décadas despois, abrimos a XX edición do festival recuperando aquel mesmo espírito fundacional coa interpretación de Le chant du vent para frauta, de Johannes Donjon, unha das obras que soaran naquel primeiro encontro.
Patricia González e Samuel Diz iniciaron a súa formación no Conservatorio Profesional de Música de Tui e completaron os seus estudos superiores na Coruña e en Sevilla, respectivamente. Dende entón, desenvolveron traxectorias complementarias: Patricia González orientou a súa carreira cara á pedagoxía e é actualmente profesora de frauta e coordinadora de Secundaria, Innovación Educativa e Intelixencia Artificial no Obradoiro International School; mentres que Samuel Diz combina a interpretación coa investigación, cunha especialización na música da Xeración do 27.
Neste contexto xurdiu a colaboración entre Samuel Diz e o tenor arxentino Jonatan Alvarado, que comezou coa gravación dun disco en Granada empregando a guitarra histórica de Federico García Lorca, con obras de Manuel de Falla e Carlos Guastavino, e deu continuidade ao actual traballo discográfico El mal de l'amor: The Songbook of Gustavo Durán (Poliédrica, 2026) do que neste concerto interpretan unha escolma de pezas.
En paralelo, a relación de Jonatan Alvarado con Música no Claustro remóntase a 2018, cando ofreceu no claustro medieval o seu primeiro concerto en España. Aquel recital marcou o inicio dunha traxectoria que o levou a actuar nos principais festivais de música antiga de España. O seu vencello coa Catedral de Tui consolidouse en 2023, cando liderou a recuperación sonora da Misa medieval de San Telmo, froito dun traballo de investigación desenvolto a partir das fontes musicais conservadas no arquivo catedralicio. Ese labor de estudo e interpretación do patrimonio musical continúa nesta edición cunha nova recuperación, realizada no marco do oitavo centenario da consagración da sede tudense: o Graduale in Festo Dedicationis Ecclesiae Locus iste, unha peza vinculada á liturxia da dedicación dunha igrexa e empregada, nalgún momento da intrahistoria da diocese, na celebración da apertura dun novo templo.
Canto gregoriano e músicas populares da Península Ibérica e América Latina dialogan neste concerto co violín fiddle de Begoña Riobó e a zanfona de Anxo Pintos. Un regreso ao festival despois da estrea do seu proxecto Pärbo.
O concerto culmina coa interpretación da Bailada de Gustavo Durán, a obra que o diplomático das Nacións Unidas compuxo nos Estados Unidos en 1951 a partir dunha cantiga de Martin Códax. Unha peza festiva na que converxen a tradición medieval galaico-portuguesa e a creación musical contemporánea dun compositor amante da beleza.
Patricia González en Música no Claustro 2005
